بزم حضور آفتاب ملت میں کہا گیا نعتیہ کلام
مصرع طرح ۔
‛‛بلا لیجے مرے آقا مرے رہبر مدینے میں‛‛
افاعیل ۔
مفاعیلن مفاعیلن مفاعیلن مفاعیلن
------------------------------------------------------------
نعت شریف
منور یوں ہے ان کا روضہء انور مدینے میں
فلک سے بھی نظرآتا ہے روشن گھر مدینے میں
شراب دید سے سیراب کر دیتے ہیں بلوا کر
ہر اک تشنہ نظر کو ساقئ کوثر مدینے میں
کسی صورت سے اتنے کٹ گئے ایام لیکن اب
‛‛بلا لیجے مرے آقا مرے رہبر مدینے میں‛‛
چلو بادہ کشو پی کر مٹالیں حسرتیں دل کی
پلاتے ہیں نبی توحید کا ساغر مدینے میں
سلاطین جہاں کوپھرنہ میں خاطر میں لاؤں گا
بناکر وہ اگر رکھ لیں مجھے نوکر مدینے میں
لے ناخن ہوش کا زائر حرم محبوب رب کا ہے
ادب کا پاس رکھنا ہر گھڑی رہ کر مدینے میں
خیال آتا ہے تو اے تاج قابو میں نہیں رہتا
چلا جاتا ہے دل تن سے جدا ہوکر مدینے میں
=================================
نتیجہء فکر۔ محمد نسیم اختر (تاج رانچوی)
الجامعہ القادریہ (اسلامی مرکز)
ہند پیڑھی رانچی (جھارکھنڈ)
٢٥ نومبر ٢٠٢٢ ء
مبائیل نمبر ۔ 7870900980
){kind=link}
0 تبصرے