پڑھ کے مجھ کو کلام خدا عید میں
منفرد آیا کیف ومزہ عید میں
خوب کر حمد رب العلیٰ عید میں
ساتھ ہی مدحت مصطفیٰ عید میں
بخش کر رب ہمیں لیلة الجائزہ
خوب دیتا ہے اجر و جزا عید میں
کر لیے اس کے روزے خدا نے قبول
جس نے فطرہ ادا کر دیا عید میں
ایک دوجے کو آپس میں ملتے ہوئے
دیکھ کر دل مرا خوش ہوا عید میں
ترک کر دے سبھی گندی عادات کو
دل سے بغض وعداوت مٹا عید میں
ہر قدم پر جو دے درس عشق و وفا
ایسا مل جائے حق آشنا عید میں
راضی ہوجائے گا تجھ سے ربِّ قدیر
اپنے اعمال بہتر بنا عید میں
میری ماں میرے حق میں دعا کر یہی
راضی ہوجائے مجھ سے خدا عید میں
رب نے موقع عطا بے بہا ہے کیا
بخشوا اپنی ساری خطا عید میں
خوش نظر کیوں نہ آئیں متینی سبھی
خوشنما ہوگئی ہے فضا عید میں
شاداب متینی علیمی واپی گجرات
0 تبصرے